2024 жылдың 26  қараша күні № 1 Алматы қазақ гуманитарлық-педагогикалық колледжінде «ПЕДАГОГТЕР ДИНАСТИЯСЫ» имидж кездесу қалалық деңгейде өткізілді. «ПЕДАГОГТЕР ДИНАСТИЯСЫНЫҢ»  мақсаты – педагогтер әлеуетін дәріптеу және мұғалім мамандығының тартымдылығын, студенттердің болашақ мамандығына деген сүйіспеншіліктерін арттыру. Бүгінгі имидж кездесуге еліміздің педагогика саласында тұңғыш рет Қазақстанның  Еңбек Ері алтын жұлдыз орденімен марапатталған   Аягүл Төреқызы Миразова және педагогтар әулеті қатысты. Аягүл Төреқызының шәкірттеріне парасат биігіне жол сілтеген ұстаздық жолы және болашақта ұстаздық мамандықты таңдаған жас ұрпақ үшін  еліміз  өнеге тұтатын тұлғаны шәкірттерге тереңірек таныту мақсатында  бейнебаян ұсынылды. Ұлағатты ұстаз колледж білім алушыларымен 50 жылдан астам ұстаздық еңбек жолындағы өмірлік тәжірибесімен және шәкірттерінің жетістіктерімен ой бөлісті.  Бүгінгі кешке  танымал тұлғалармен қатар бүкіл ғұмырын тәрбие беруге, білімге, педагогикаға, ғылым мен ағарту ісіне арнаған педагогикалық династия өкілдері Кенжеевтер отбасы мен үш ұрпақпен жалғасын тауып отырған Ташиевтар отбасы қатысты.   Бүкіл ғұмырын тәрбие беруге, білімге арнаған педагогтер династия өкілдерімен сыр-сұхбат жүргізіліп,отбасы мүшелерінің ұстаздық жолындағы еңбектері  таныстырылып, бейнебаяны көрермендер назарына ұсынылды. Педагогтер династиясы – ерекше өмір сүру образы, бұл әулеттегі адамдардың ерекше жандар екендігінің айғағы, бұл отбасындағы бірнеше ұрпақ өкілдерінің, отбасы мүшелерінің  мамандыққа деген адалдығы екенін білуге болады.Болашақ мамандар  «Педагогтер династиясының» ұстаздық жолындағы еңбектеріне, педагогикалық саланы өркендетуіне, ерік күші мықты, еңбекқор, ең бастысы өз мамандығын жан тәнімен сүйетін тұлғалардың өскелең ұрпаққа зор үлгі өнеге көрсетіп отырғандарына куә болды.